Градски Театар Скопје е отворен за истражување, провоцирање и изнаоѓање на нови театарски форми, нов театарски јазик, нова театарска драматургија низ една лабораториска практика на преиспитување и докажување на театарските вредности. 

Оваа сцена промовира проекти на авторски тимови кои се спротиставуваат на востановениот конвенционален, шаблонизиран театарски израз - репрезент на масовната култура. Воспоставувањето на редовен репертоар во кој сите нови естетски идеи и ставови ќе можат секојдневно да комуницираат со публиката. Само така, оваа нова театарска сцена може да стане влијателна во освојувањето на новите театарски естетики и изрази кои треба да диктираат квалитетно, креативно и прогресивно театарско мислење. 

Воведување на “лабораториски процес“ во подготовката на претставите е нов правец кој овој театар ќе се обиде да го наметне како практика во реализација на една театарска претстава. Соработката на театарските творци со професионалци од сродни области, историчари на уметност, естетичари, философи, психолози... ќе создаде специфичен придонес кон унапредување на подготвителниот процес. Важен правец за развивање на оваа сцена е имплементирањето на заклучоците и анализите од подготвителниот процес, во работата на сцена, каде главниот акцент ќе биде кон диференцирањето на нов актерски израз. 

Издавањето на публикации кои се структурирани во повеќе едиции во зависност од проблематиката со која се занимаваат е неизоставен дел од овој театар. Едиции од најуспешните текстови од јавните читања; избор од најуспешните и најпровокативните заклучоци од ново воспоставените теории од процесите за подготовка на претставите; објавување на стручна теориска, но и актуелна светска драмска литература... 

Очекувано, приоритетни се гостувањата на театарски проекти и екипи кои практикуваат слични принципи на творење и кои се актрактивни и интересни за публиката, а компаративни за екипите, авторите и посетителите кои се дел од овој т е а т а р .