Младинскиот културен центар ја промовира стихозбирката “Четириесет воздивнувања“ од Борче Грозданов-Пандур на 21ви ноември (сабота) со почеток во 18.30 часот во галеријата на МКЦ.

Со оваа поетска книга авторот преку  четириесет тристишија симболично ја одбележува четвртата деценија од неговиот живот како и ефективните дваесет  и пет години творечка работа. Затоа промоцијата ја закажуваме токму  на неговиот роденден. Содржината на “Четириесет воздивнувања“ е всушност отворена поетска слика што авторот ја доживува и преживува длабоко во, за, од, и до себе.

Промотор на ова двојно славие е поетот, прозаист, есеист и драматург г-динот Трајче Кацаров, а стихови од Борче Грозданов–Пандур ќе интерпретираат актерите Зорица П. Панчиќ и Васил Шишков.

МКЦ ви го претставува концертот на PARAMOUNT STYLES и CONSTANTINE ODESSA во кино Фросина во среда, 18ти ноември во 21 часот.

Њујоршкиот состав Paramount Styles е новиот бенд на Scott McCloud и Alexis Fleisig од (на скопската публика добро познатите) Girls Against Boys. Креирани на патентираниот GVSB темплејт и во друштво на Chris Smets (Star Club West), Richard Fortus (Guns & Roses, Psychedelic Furs), Simon Lenski (DAAU), Julia Kent (Antony & the Johnsons) и Micheal Hampton (Faith) продолжуваат таму кадешто застана GVSB приказната. Акустично и возбудливо. Турнеата на PARAMOUNT STYLES започнува токму во Скопје!
Локална поддршка ја даваат Constantine Odessa (Коста Лошков од Denny Te Chuva).

Влезница: 200 денари
Резервација на билети на: Оваа е-пошта е заштитена од spambots, треба да вклучите JavaScript за да ја видите

{comments}

Градски театар Скопје на 15. ноември (недела) со почеток во 20 часот ја претставува премиерата “ЕСКУРИАЛ“ од Мишел де Гелдерот во режија на Ристо Алексовски. 

Мишел де Гелдерот еден од најамблематичните автори на постмодерниот театар, препознатлив по исклучително остриот естетски и тематски авторски потпис, секогаш скицирајќи и препознавајќи ги болестите на општеството и индивидуата. Самата пиеса во себе ја носи темата на оправданото насилство, насилство чиј лајт-мотив е апсолутната, фиктивна морална правда. 

“Што значи да го пронајдеш апсолутниот мир? Да излезеш пред сопствениот џелат и да го иронизираш сопствено значење, помирувајќи се со бизарноста на вековите, насилството и ситуацијата.

Барајќи ја универзалната сатисфакција, иако знаеш дека не си создаден да ја прифатиш истата.“ Во претставата играат Сашо Тасевски и Рубенс Муратовски, костимографијата е на Ивана Кнез. 

Оваа претстава е копродукциски проект помеѓу меѓународниот театарски фестивал МОТ, Градски театар Скопје и Драмскиот театар Скопје, а својата прва изведба ја имаше на овогодинешното издание на фестивалот МОТ. 

Карти за претставата можат  да се купат на касата на Младинскиот културен центар по цена од 300 денари, за ученици и студенти билетот е по цена од 170 денари.

{comments}

Во петок, 13 ноември, во галеријата на Младинскиот културен центар во 19:30 часот ќе се одржи вечер посветена на Албер Ками, еден од најмаркантните и најпопуларни француски писатели и филозофи на дваесеттиот век. Ками е познат по своите романи, драми и есеи, по брилијантноста и чистотата на својот збор, а вечерта ќе се одржи по повод 96 години од раѓањето и 50 години од неговата смрт. За животот и делото на Албер Ками ќе зборуваат проф. д-р Ферид Мухиќ и проф. д-р Иван Џепаровски, а интерпретација на дела од Ками ќе изведува Виктор Јаневски. Вечерта ќе биде поздравена од советникот за култура и соработка при амбасадата на Франција во Република Македонија, господинот Жоан Ирез.
 

{comments}

Во рамките  на затворањето на програмата на ПРОХЕЛВЕЦИЈА, Женскиот младински хор на Младинскиот Културен Центар Скопје, под диригенство на Сашо Татарчевски ќе ја изведе  MANTRA DISKREATION од Александар Пејовски, композиција за женски хор, инструментален секстет и трака. Концетот ќе се одржи на 12ти ноември во кино Фросина со почеток во 19 часот. 

{comments}

Со осебно задоволство МКЦ  ви го претставува концертот на Еди Сеџвик и Хахаха. Терминот е среда, 11. ноември. Влезницата е 200 денари.

Justin Moyer ака ЕДИ СЕЏВИК (Edie Sedgwick) е реинкарнација на познатата суперѕвезда на Енди Ворхол - Edith Minturn Sedgwick (1943-1971). Доаѓа од Њујорк и продуцира памфлети, видео инсталации, хаику поезија, скечеви, блогови, есеи и, се разбира музика, инспирирана од Американската селебрити култура. Во својата дискографија има 3 албуми, а последниот Things are Getting Sinister and Sinisterer е реализиран за легендарниот Dischord Records.

ХАХАХА се Rites of spring, Husker Du & Jones Very wannabe бенд од Скопје. Ова е нивен деби настап.

{comments}

Младинскиот културен центар во чии рамки работи Градски театар Скопје на 10. ноември (вторник) со почеток во 20 часот на репертоарот ја има изведбата на театарската претстава ПРАЗЕН ГРАД од Дејан Дуковски во режија на Андреј Цветановски. Претставата зборува за двајца млади луѓе заглавени во подрумот на светот. Не можејќи да излезат надвор, се забавуваат на начин и средства кои им се достапни во просторот.
          “На кој начин да си ги исполниме животите за да не ја чувствуваме празнината кое го носи општеството.. Како да се преживее периодот на младоста? Каде е заглавена нашата генерација? Зошто не дава знаци на активен живот, туку ги прима ударите што и ги задава животот?  Тоа се прашањата кои ги поставува оваа претстава, автентична по израз и сценски простор.“ Во претставата играат Арџент Хасани и Берат Салиу, сценографијата е на Владо Ѓорески.

       Карти за претставата можат да се купат на касата на Младинскиот културен центар по цена од 250 денари, за ученици и студенти билетот е по цена од 170 денари.

{comments}